Tað er lítið sannlíkt, at Country Festivalurin og Voxbotn verða á skránni í ár.

Løgmaður, Bárður á Steig Nielsen boðaði frá í dag, at landsins myndugleikar mæla frá at halda festivalar og onnur størri tiltøk fram til og við 30. juni.

Harvið hanga eisini stevnurnar í klønum tráði.

Enn er óvist, hvussu verður við G! og Summar Festivalinum í ár. Løgmaður segði, at støða verður tikin, tá komið er nakað út í næsta mánað, hvussu verður við festivalunum, sum skulu verða í juli og august.

Arbeitt verður við at geva endurgjald til festivalarnar.

- Vit fara at gera eina serskipan til festivalarnar, so at teir eisini kunnu fáa stuðul og lut í hjálparpakkunum hjá landsstýrinum, segði løgmaður á tíðindafundinum í morgun.

Hvat viðvíkur kaffi-og matstovum, so er nýggjasta tilmælið, at tær kunnu hava opið til klokkan 22 til og við 30. juni.

Mælt verður harðliga frá, at skeinkistøð hava opið til langt út á náttina í vikuskiftunum.