Í 7 minuttir og 25 sekund fáa fýra fólk, sum øll eru samd, fría mikrofon, har eingin kritiskur spurningur verður settur.

Tað er sambært Helga Abrahamsen, landsstýrismanni í umhvørvis- og vinnumálum, ikki gott nokk. Hann sipar til innslag í Degi og viku, har tvey foreldrapør ynskja rættindi til síni børn, sum eru samkynd.

- Tað verður vanliga roknað sum ein óskikkur í journalistikki. Tú skalt ikki lata nakran sleppa at bera síni sjónarmið fram, uttan at geva mótspæl – annaðhvørt við kritiskum spurningum, ella við at lata onkran ósamdan sleppa at svara, skrivar Helgi Abrahamsen í støðudagføring á Facebook.

Hetta hevur elvt til kjak á tránum. Millum annað spyr framsóknar tinglimurin Bjarni Kárason Petersen, um tað er vanligt at føra kritiskan journalistikk, tá man ger samrøðu við vanligar stúrandi borgarar.

- Hví skulu fólk ikki fáa kritiskar spurningar - ella fáa mótspæl frá øvugta sjónarmiðinum. Føroyingar eru ósamdir um hatta evnið, og tað kann ikki vera rætt, at Kringvarpið lovar øðrum sjónarmiðinum framat og ikki hinum, skrivar Helgi Abrahamsen.