Tað kundi enda heilt galið í Søldarfirði, nakað sunnanfyri rundkoyringina á Skipanesi fyri trimum árum síðani.

Seint seinnapartin hendan dagin vóru tveir treylarar sum rendu saman, og annar koppaði oman av vegnum og oman í ein urtagarð. Nú trý ár seinni er bilverja sett upp.

Talan var um urtagarðin hjá Hilmari Johannesen og konuni.

- Var hann eitt sindur longur norði, kom hann inn í køkin, greiddi ein skelkaður Hilmar Johannesen frá í Útvarpinum hetta kvøldið í 2017, tá hendingin fór fram.

Eingin stórvegis mannskaði stóðst av hendingini.

Beinanvegin eftir hendingina var Henrik Old, sum tá var landsstýrismaður í samferðslumálum í Degi og viku, og boðaði frá, at hámarksferðin skuldi setast niður, og at bilverjur skuldu setast upp á vegastrekkinum.

Leingi er tað, ið væl skal vera, tí nú er Landsverk farið í holt við at seta bilverju upp.

Landsverk í holt við at seta bilverju upp í Søldarfirði (Mynd: Tórbjørn Jacobsen)