Tann 30. apríl kunngjørdu myndugleikarnir, hvussu næsta stigið av upplatingini av samfelagnum skuldi fara fram.

Løgmaður staðfesti tá, at tilmælið, um at matstovur, kaffistøð og skeinkistøð eiga at lata aftur í seinasta lagi klokkan 22, framvegis var galdandi.

Higartil hava skeinkistøðini tó ikki fylgt hesum tilmælinum so strangt.

Nøkur teirra høvdu opið til longur enn klokkan 22 síðsta vikuskifti.

Sambært vaktleiðaranum á politistøðini, stongdu seinastu skeinkistøðini klokkan 1.30 sunnunáttina.

Les meira: - Tilmælini geva ikki meining longur

Nú boða so nakrar barrir frá á sosialu miðlunum, at tær hava opið til á midnátt í vikuskiftinum, sum stendur fyri framman.

Blárbar hevur opið fríggjakvøldið og leygarkvøldið frá klokkan 20 til 24, meðan Bjórkovin hevur opið frá klokkan 20 til 24 hóskvøld til leygarkvøld, fyribils í óásetta tíð. Taboo hevur opið til klokkan 23 í vikuskiftinum.

Vit hava fingið upplýst, at eigararnir av skeinkistøðunum í Havn høvdu fund í síðstu viku. Á fundinum samdust teir um, at øll skeinkistøðini - bæði barrir og náttklubbar - hava opið til klokkan 24 í vikuskiftunum.